"بیزیم ائلده باهار گلیر"

گونش چیخیب داغ باشیندان، سره نیبدیر هر یانا

زولاخ زولاخ کوچه لردن، گزیر چیخیب سیرانا

سنده بیر گل ال اله وئر، بیزده چیخاخ گلشانا

بیزیم ائلده باهار گلیر، گل بیر چیخاخ سیرانا

قار اریر داغ دوشونده،  نوروزو گولو تیتریر

قنچه دوداخدان بال آخیر،  تّلری ده سیلکنیر

سرین یلین قاباغیندا،     کوزه چیین ده گلیر

بیزیم ائلده باهار گلیر،  گل بیر چیخاخ سیرانا

داغ دوشونده قار آلتیندان،  جنّتین سویو آخیر

بولاخلارین گوزلرینه،   جیران گوزو یاناشیر

توپراخلارین بوغلارینا،  بیلدیرچینلر بولاشیر

بیزیم ائلده باهار گلیر،  گل بیر چیخاخ سیرانا

طوله لرده قوزو مه لر،  آچایدیخ قاپیلاری

"مح"* یئلی باشلایب اسیر،  یئله بوراخ ساچلاری

"گادار" چایی شاّقیلدایر،    عاشیخلارین سازلری

بیزیم ائلده باهار گلیر،  گل بیر چیخاخ سیرانا

چیخایدیم من داغ دوشونه،     سیرانا بیر یاریلا

نوروز گولو قار آلتیندان، باش قالدیریب ساریلا

قوزولار کوشنه چیخیب،  مه له شیّلر   داغیلا

بیزیم ائلده باهار گلیر، گل بیز چیخاخ سیرانا

او دنیانی نی لیرم،        جنّت منیم دیاریم

بیر دونیدیم اوشاغ اولوب،  باغلار مینم اویلاغیم

دنیز اوغلون قوربتده دیر،  خان طاوسوم، سلطانیم**

بیزیم ائلده باهار گلیر،  گل بیر چیخاخ سیرانا

**"خان طاووس"  و "سلطان یعقوب" سولدوزون مشهور داغلارینداندیلار----*-"مح یئلی" باهاردا اسن یئل دی کی بیزیم ماهال دا اسر.